Чацвёрты дзень у Беларусі ідзе датэрміновае галасаванне. Іменна пад час гэтага галасавання адбываюцца асноўныя фальсіфікацыі, лічыць  кандыдат у дэпутаты Брэсцкага абласнога савета ад партыі БНФ Уладзімір Вялічкін. Але ён цвёрда ўпэўнены, што  апазіцыі ад выбараў адмаўляцца не трэба.

- Работнікаў прадпрыемстваў, шэраговых грамадзян змушаюць на датэрміновае галасаванне. І небяспека заключаецца ў тым, што ніхто  не ведае і практычна на сённяшні дзень немагчыма адсачыць, што робіцца са скрынямі для датэрміновага  галасавання па начох. І практыка папярэдніх выбараў сведчыць аб тым, што бюлетэні, якія знаходзяцца ў скрыні датэрміновага галасавання яны  ў апошнюю ноч замяняюцца на бюлетэні на карысць праўладнага кандыдата.

Па словах Вялічкіна, нягледзечы ні на што, з гэтай выбарчай кампаніі ён ужо мае пазітыўныя вынікі параўнальна з мінулымі выбарамі. Тады было надрукавана 7 тысяч улётак з яго тэлефонам -  не было ні воднага званка. На дадзены момант улётак менш на дзве тысячы, а было ўжо шмат званкоў і асабістых наведванняў.

Ганна Васілевіч, Радыё Рацыя.