У беларускай сталіцы за 20 дзён мая выпала 114 мм ападкаў, амаль дзве месячныя нормы. Гэта рэкорд па суме выпаўшых ападкаў у бягучым годзе, паведаміла галоўны сіноптык Рэспубліканскага гідраметэацэнтра Вольга Фядотава.

Май выдаўся асабліва дажджлівым у большасці раёнаў Мінскай і Брэсцкай абласцей, а таксама на ўсходзе Віцебскай вобласці. У гэтых рэгіёнах сумарная колькасць ападкаў за мінулы перыяд дасягае 75-100 мм, што адпавядае 1,5-месячнай норме.

Разам з тым Балканскі цыклон, які прынёс паводкі ў краіны Еўропы, не акажа ўплыву на фарміраванне надвор'я ў Беларусі, запэўніла галоўны сіноптык Рэспубліканскага гідраметэацэнтра, абвяргаючы тым самым інфармацыю некаторых СМІ, што такі цыклон гэтымі днямі чакаюць у Беларусі.

Паводле даных спецыяліста, цяпер над Беларуссю ўзмацніў свой уплыў Скандынаўскі цыклон, а паветраныя масы ў нашу краіну паступаюць з еўрапейскай часткі Расіі. Вільготнае паветра з Балкан адціснута на Украіну. Таму ў пятніцу, 21 мая, і ў суботу, 22 мая, у Беларусі будзе пераважаць малавоблачнае і без ападкаў надвор'е. Толькі ў суботу ў Гродзенскай і Віцебскай абласцях магчымы лакальныя дажджы і навальніцы. У нядзелю, 23 мая, вільготныя паветраныя масы, што паступаюць з Балтыйскага мора, прынясуць непрацяглыя дажджы ў многія раёны рэспублікі, паведамляе БЕЛТА.