Уладзімір Някляеў быў гатовы і да больш жорсткага варыянту развіцця падзеяў – па словах лідэра грамадскай кампаніі “Гавары праўду!”, які быў затрыманы ў аўторак 18 траўня, ён ужо рыхтаваўся як найменш да трохгадовага тэрміну зняволення.

Паводле паэта, якога сёння міліцыянты вызвалілі з-пад варты без прад’яўлення якіх-небудзь абвінавачанняў, беларускія ўлады цалкам маглі пайсці і на такі крок.

- Па-шчырасці, я не думаў, што выйду сёння, неяк яно па ўсім выглядала - што гады праз тры. Яшчэ не ўсвядоміў, што калі выходзіш і праз тры дні - гэта таксама асалода. Яны думаюць, што з офіса яны вывезлі ўсё, толькі не змаглі забраць цвікі, якія загнаныя ў сцены. Магчыма думаюць, што адарвалі нам галаву. Але я думаю, што ў праўды галоў столькі - колькі галоў у людзей. Праўда не знаходзіцца ў офісе. Гэта ёсць зарука таго, што праўда ў гэтай краіне, у гэтых галовах нашымі высілкамі пераможа.

Зараз Уладзімір Някляеў мае намер звярнуцца ў пракуратуру са скаргамі на дзеянні супрацоўнікаў міліцыі адносна незаконнага затрымання яго ды ягоных паплечнікаў, а таксама канфіскацыі з кватэры асабістых рэчаў і рукапісаў, якія, на думку паэта, ніякім чынам не могуць быць прызнаныя доказамі па крымінальнай справе.

Барыс Гарэцкі, Радыё Рацыя, Мінск. (Фота Радыё Свабода).